Полицијата во Истанбул денеска целосно го блокирала пристапот до плоштадот Таксим по акцијата, во која од паркот Гези се избркани сите демонстранти.
Запрено е движењето на автомобили по улиците што водат до Таксим. Не се дозволува ниту минување на пешаците во реонот на плоштадот.
Во Истанбул неколку илјади демонстранти креваат барикади на главната улица, што води кон централниот плоштад Таксим, соопштија руски медиуми, цитирајќи очевидци.
Откако полицијата упадна во истанбулскиот парк, еден од главните турски синдикати – Конфедерацијата на синдикати на државните службеници (КЕСК) соопшти дека за понеделник свикува генерален штрајк.
-Веќе одлучивме да штрајкуваме доколку во паркот се изврши интервенција, така што утре ќе свикаме штрајк за понеделник, изјави Мустафа Тургут, портпарол на конфедерацијата која опфаќа околу 240.000 членови од 11 синдикати