Талат Џафери, министерот за одбрана, денеска се поклони пред споменикот на УЧК во кумановското село Слупчане, јавува порталот Алмакос.
Делегација на ДУИ предводена од вицепремиерот за спроведување на Охридскиот договор, Муса Џафери, министерот за одбрана Талат Џафери, вицепремиерто за евроинтеграции Фатмир Бесими , министерот за правда Блерим Беџети, портпаролот на ДУИ Бујар Османи, градоначалник на Липково, Садула Доманику, заменик-министер за внатрешни работи Бајрам Џалал им оддадоа почит на паднатите жртви на конфликтот во 2001 година во селото Слупчане.
Џафери во својот говор истакна дека им оддваат чест на мачениците во конфликтот во 2001 година.
На чествувањето не присуствуваа официјални македонски претставници, јавува Алмакос.
Поранешни војници на ОНА и селаните во Слупчане денеска соопштија дека се против доаѓањето на функционери Албанци на оддавањето почит на гробиштата на паднатите борци.
Праксата со оддавање на почит за загинатите од ОНА од страна на министрите за одбрана и други владини функционери почна со Фатмир Бесими минатата година како министер за одбрана.
Таквата постапка од униформирани припадници на АРМ тогаш ги заостри односите меѓу коалициските партнери што кулминираше со предложениот закон за бранителите од страна на ВМРО-ДПМНЕ која остана блокиран уште во собраниската комисија.