Со неколкучасовно задоцнување поради силен јужен ветер, авионот со кој Тамара Тодевска и нејзиниот тим патуваа од Израел слета на скопскиот аеродром каде ја пречекаа семејството, фанови и претставници на Владата.
„ Отидовме, видовме, победивме. Извенете што не чекавте долго, не беше до нас. Ова е резултат на тимска работа, на многу љубов, на многу посветеност. Работевме три месеци. Добро поминавме, иако очекувавме и повеќе. Многу сум среќна што се обединивме. Сега кога ќе се спомне Македонија нема да им биде сеедно– им се обрати Тамата на присутните.
Тамара Тодевска го освои осмото место што е најдобар пласман откако учествуваме на Евровизија.
Тамара во текот на речиси целото гласање беше на врвот на табелата. По гласањето на стручните жирија освои 237 поени и беше на второ место, зад Шведска која имаше 239 бодови, но по пребројувањето на гласовите од публиката се пласираше на осмото место.
Северна Македонија доби максимални 12 поени од Австрија, Велика Британија, Албанија, Молдавија, Србија и Швајцарија.
На годинашниот избор за песна на Евровисија што се одржа во Тел Авив, Израел, победи холандскиот претставник Данкан Лоренс со песната „Arcade“.
Aвтори на песната „Proud“ со која настапи во Тел Авив се Роберт Билбилов, Дарко Димитров и Лазар Цветкоски, а текстот е на Коста Петров и Сања Поповска. Придружни вокали беа Александра Јанева, Антонија Гиговска и Васил Гарванлиев.
https://www.facebook.com/MediumskaInformativnaAgencija/videos/2138796926157851/