Руска телевизија го откажа емитувањето на шоуто во кое се прави шега на сметка на разводот на претседателот на Русија Владимир Путин, изјави денеска еден од водителите на емисијата.
Путин во четвртокот објави дека тој и неговата сопруга Људмила по 30 години брак одлучиле да се разведат.
Оваа вест ги мотивираше авторите на емисијата за млади „Социјална мрежа“ да снимат пародија за тоа како 60-годишниот руските претседател отвара профил на сајт за пронаоѓање на партнер.
Снимивме видео за фотографиите на Путин за сајтот мамба.ру, а тие ја откажаа целата емисија, напиша на Фејсбук еден од водителите на програмата, Владислав Сорокин.
Сорокин истакна дека тој и водителката Јекатерина Воронина планираат да дадат отказ од емисијата, која се прикажува секоја вечер во работните денови на телевизијата „Обшественоје телевиденије“.
Генералниот директор на телевизијата Анатолиј Лисенко демантираше дека емисијата е повлечена поради цензура. – Тоа се лаги, ништо не е забрането, рече тој и додаде дека емисијата, која требала да биде емитувана вчера е повлечена поради тоа што не била навреме подготвена.
Телевизијата „Обшественоје телевиденије“ постои од минатиот месец. Таа е отворена на иницијатива на премиерот Дмитриј Медведев.