Стартот на изградбата на новиот Клинички центар од крајот на оваа година како што беше најавено вчера, се пролонгира на почетокот на наредната година. Новиот Клинички центар ќе чини 500 милиони евра, а парите од кредитната линија ќе бидат обезбедени од конзорциум од три банки: „Рајфајзен банк“, „Уникредит“ и „Ерсте груп“ кои биле избрани во селекција од шест други понуди, информира на денешниот брифинг со новинарите во Влада, министерот за здравство Венко Филипче.
„Министерството за финансии испрати 18 барања до меѓународни инвестициски фондови и комерцијални банки. Шест од нив одговорија по што е избрана понудата која беше најповолна, проектот да се финансира од банките „Ерсте груп“, „Рајфајзен банк“ и „Уникредит““, рече Филипче на брифингот со новинарите, во Влада.
Филипче како министер за здравство под чија палка е овој најголем проект во државата- не знае под кои услови ќе биде финансирањето, колкави ќе бидат каматните стапки и на колку години граѓаните ќе го исплаќаат кредитот за овој грандиозен објект и на одговор упати во Министерството за финансии.
„ За овие работи најдобро да упатите прашања во Министерството за финансии, тие ги правеа анализите и ќе кажат детали колку државата е задолжена за новиот Клинички центар. Условите под кои ќе се враќа кредитот ги имаат во финансии, па не би сакал да шпекулирам со бројки “, одговори Филипче на новинарски прашања.
Тој најави дека во тек е технички дијалог, а на почетокот на август ќе биде распишан тендер во кој ќе бидат вклучени во пакет проектот, изградбата, опремата и обуката на персоналот. Филипче најави дека проектот и сите инфраструктурни работи, струја, вода, гас, сеизмолошки испитувања за хелиодромот ќе бидат завршени до крајот на годината.
Клиничкиот центар ќе биде со површина од 105 000 метри квадратни, а ќе се гради на земјиште од 30 хектари. Изградбата ќе се одвива во три фази, а целосно се очекува да биде завршен за 7 години.
За разлика од претходниот проект за Клинички центар кој требаше да биде на површина 61 500 метри квадратни и да чини 72 милиони евра, новиот е двојно поголем во однос на површината но, е седум пати поскап од претходниот.
Физибилити студијата која беше договорена на ниво на влади меѓу Австрија и РС Македонија со бесплатна правна помош е веќе готова и наскоро ќе биде ставена на јавна расправа. Филипче потенцираше дека се што прават е во консултација со опозицијата.
На новинарско прашање што ќе биде со сегашниот Клинички ценатар, Филипче одговори дека дел од него ќе остане и ќе се искористи за здравствени услуги на граѓаните во овој дел од градот, но деталите се уште не се прецизирани.