Транспаренси Интернешнл – Македонија ќе поднесе неколку кривични пријави против организаторите на кампањите на ВМРО ДПМНЕ и ДУИ поради сомнежи за изборни злоупотреби и за овогодинешните кампањи за претседателските и предвремените парламентарни избори, но и за ланските локални избори.
-Пријавите воглавно се однесуваат на незаконско плаќање на трошоци за изборните кампањи, како плаќање во кеш и користење средства на локалните самоуправи и јавните претпријатија за партиски цели, вели Слаѓана Тасева, претседател на македонскиот огранок на Транспаренси Интершнл.
Транспаренси Интернешн обелоденија документи кои покажуваат дека огранокот на ВМРО ДПМНЕ на 26 Март годинава во Прилеп платиле во кеш, односно со каса-прими трошоци за местење бина во Прилеп за митинг на партијата. Тасева вели дека со ова е прекршен член 71 од Изборниот законик според кој сите трошоци за кампањата мора да се исплаќаат од сметката на партијата која е специјално отворена за изборите. Невладината ги добила овие информации на барање за слободен пристап до информации лично од одговорните во претпријатието, кои сакајќи да покажат дека јавното претпријатије не работел без пари, им ги дале сите фактури и копии од каса-прими документот.
Служејќи се со законот за слободен пристап до информации, а сакајќи да провери обвинувања на ДПА кон ДУИ изнесени на митинг годинава, Транспаренси Интернешнл на истиот начин добила потврда од општината Студеничани дека за време на локалните избори во Фебруари 2013 општината платила фактури за компјутери по, според нив, „наредба за плаќање од Артан Груби од ДУИ“.
Општина Студеничани на Транспарентност им испратиле две фактури кои, според нив, биле пратени од Груби, а со кои се нарачувале компјутери. Во прилог на фактурите дополниле дека за овие нив немало склучено договор за јавна набавка, а ја испратиле и електронската порака од Артан Груби, шеф на изборната кампања на ДУИ, во која тој го пишал следново:
„Во прилог ти праќам 2 фактури и те молам ако може општината да ги покрива. Секоја општина ни помагала со ист износ, обезбедувајќи големи знамиња, компјутер, големи телевизори за прес конференција, говорници, микрофони, мискета и др.“, пишал Груби до општината, според маилот кој им бил препратен на Транспарентност Интернешнл.
Артан Груби за НОВА вели дека тие остануваат на истиот став од пред две недели – парите биле потрошени за манифестацијата „Ден на кечето“. Останува нејасно за која цел биле компјутерите за оваа манифестација, за која во медиумите може да се најдат податоци дека прославата била одржана во Албанскиот театар, институција која располага со соодветна опрема за одржување вакви манифестации.
“Овие случаи покажуваат дека Република Македонија се уште нема поставено цврсти механизми за следење и заштита од ваков тип злоупотреби, што е загрозувачки за демократскиот развој на државата, бидејќи не може да се говори дека изборната кампања била фер и условите биле подеднакви за сите учесници“ – изјави претседателката на ТИ-М, Проф. Д-р Слаѓана Тасева.
ТИ-М во рамките на својата работа ќе поднесе и известувања за сите овие случувања до Државната Изборна Комисија, до Државната Комисија за Спречување на Корупцијата, до Државниот Завод за Ревизија, а ги потсетува јавните обвинители дека во некои од случаите станува збор за кривични дела кои се гонат по службена должност
