Граѓаните во Македонија, Хрватска и Србија на политичките партии гледаат како нај корумпирани од дванаесетте јавни институции кои што беа тестирани, според Глобалниот Барометар на корупција за 2013 година, кој што треба да се објави ова лето, известува Транспаренси Интернешнл-Македонија.
Во делот од извештајот објавен денеска се повикуваат Хрватска, Албанија, Косово, Македонија и Србија да го направат потранспарентно финансирањето на партиите.
Извештајот „Купување влијание: Парите и изборите на Балканот”, предупредува дека недостигот на јавна доверба во политичките партии му се заканува на демократскиот процес на Балканот.
Во Македонија, Косово и Србија веродостојноста на извештаите на политичките партии е оценета како најслаба од сите проценети области, се наведува во извештајот на меѓународната организација.
Според овој критериум, Македонија се најде на претпоследното место во регионот во категоријата на земји со недоволно веродостојни финансиски извештаи од политичките партии за финансирање на предизборните кампањи. Во истата категорија на последно место е Косово.
Пред Македонија се најдоа Србија и Хрватска, кои се во повисоката категорија со просечна веродостојност на финансиските извештаи од политичките субјекти.
Истражувањето на „Транспаренси“ дополнително утврдило дека во Македонија и Србија никогаш не биле казнети политички партии за непочитување на правилата за финансирање на предизборна кампања.
„Одредени политички партии во Македонија на нивните интернет страници објавуваат информации за финансирањето на изборните кампањи, но само една политичка партија даде директен одговор на барање за информации за нејзиниот извештај во текот на истражувањето“ се наведува во извештајот.
Ефикасноста на контролата на финансирањето е проценета како просечна, но во примената на истата, Македонија повторно се најде на последно место во споредба со другите земји во регионот.