Судењето за изборни нерегуларности на локалните избори во 2013 година „Титаник 3“ е одложено за 22 февруари за да се вложат дополнителни напори за обезбедување на еден од клучните сведоци во постапката предложен од СЈО.
Судијката Оља Ристова на денешното рочиште рече дека судот смета дека не се преземени сите мерки за пронаоѓање на сведокот Б.С. и дека е потребно да се вложат дополнителни напори со оглед дека одбраната доставила доказ, оригинален извод дека е мажена со адреса на живеење во Германија.
– Не е вложен доволно напор од државните органи. Судот ќе испрати уште една ургенција со назнака „итно“ до органите. СЈО се задолжува да направи напори да го обезбеди сведокот за следната главна расправа, изјави судијката Ристова, образложувајќи ја одлуката на судот да се одбие предлогот на СЈО за читање на исказ даден од сведокот пред јавен обвинител во истражна постапка.
Во „Титаник 3“ обвинети се Ејуп Алими и Исмет Гури од ДУИ кои се товарат дека како членови на Општинската изборна комисија во Чаир на локалните избори во 2013 година уништувале изборен материјал.
Во расправија меѓу одбраната и обвинителите од СЈО околу обезбедувањето на сведокот, обвинителката Фатиме Фетаи откри дека имало закани за нејзиниот колега Гаврил Бубевски.
Адвокатот на Ејуп Алими, Мефаил Арслани, прво рекол дека се поревносни од СЈО бидејќи обезбедиле докази дека сведокот се наоѓа во Германија, каде е мажена и со адреса на живеење.
Бубевски искоментирал: „Да, добри сте и кога ми се заканувате“, пренесе СДК.мк.
„Кој ви се заканувал“, праша адвокатот.
Тогаш, Фетаи му рече на адвокатот: „Па ти беше тој што ми ја пренесе заканата дека „ти си наша ти, може лесно да поминеш, ама на тој каурот ќе му ја расплачеме фамијата’“.