Месец јуни беше исполнет со многу активна економска пропаганда од страна на премиерот Никола Груевски и министерот за финансии Зоран Ставрески погрешно интерпретираат три прашања и ја дезинформираат македонскста јавност за прашањето за економскиот раст, за степенот на задолженост на државата и за невработеноста, се вели во најновиот извештај на Транспарентност Македонија.
„Фалбите на вицепремиерот и министер за финансии Зоран Ставрески дека додека европската економија е во рецесија и со негативна стапка од 1,2%, македонската економија, во првиот квартал од 2013 г., има позитивен раст од 2,9%, од стручен аспект, се скандалозни. Ваквите компарации меѓу македонската економија и економиите на најсилните земји членки на ЕУ, Германија и Франција, се несериозни и претставуваат популистичко искривување на фактите за реалните состојби во македонската економија“ информираат од ТМ.
„Имено, Ставревски зборува за првиот квартал од годината, а го прескокнува фактот дека
во месец мај се забележа пад на индустриското производство за 2,8%, а вработеноста, во истиот сектор, остана непроменета. Исто така, во секторот трговија, прометот во месец април забележа намалување, при што во трговијата на мало со храна, пијалоци и тутун има реално намалување од 17,1%, а во трговијата на мало (освен трговијата со горива), реалното намалување е 9,2%.
– Ова доведе до намалување и на буџетските приходи и до пораст на буџетскиот дефицит, кој во мај се зголеми за дополнителни 19 милиони евра и на крајот од мај достигна 202 милиони евра, со тенденција за понатамошен пораст. Ова не може да се случува доколку земјата има засилена економска активност и остварува позитивен економски раст. Тоа упатува на индикации за сериозни проблеми во македонската економија и за несериозно интерпретирање на економските факти во јавноста.
– Второ, континуираниот раст на јавниот долг го отвора проблемот на висината на јавниот долг, но многу повеќе и проблемот на интензитетот со кој долгот се зголемува. Според информаците од Министерството за финансии, јавниот долг на Владата во мај достигна 34,2% од БДП, или 2 милјарди и 731 милиони евра, што преставува највисоко ниво на задолженост до сега. Според проценките содржани во последниот извештај на ЕК, Македонија оваа година ќе заврши со јавен долг од 34,3%, а во 2014 тој ќе се искачи на 36,1% од БДП. И некои реномирани меѓународни институции истакнуваат дека во Македонија состојбата со јавниот долг е алармантна.
– Трето, тврдењата дека намалувањето на невработеноста во Македонија се должи на новите инвестиции и отварањето на нови работни места се, просто кажано, невистинити. Имено, во првиот квартал на 2013 г. вработеноста незначително се зголемила – како што, впрочем, и во претходните години бележеше незначителен пораст – што е спротивно на сите економски логики, бидејќи земјата беше во рецесија, но стапката на невработеност брзо се намали под 30%. Ова покажува дека оние лица што претходно се воделе како невработени во Агенцијата за вработување на Република Македонија (АВРМ), не се вработиле, туку добиле некој друг статус и се избришани од евиденцијата на невработени во АВРМ, алармираат од Транспарентност Македонија.
ТМ ги повикува премиерот Груевски и министерот за финансии Ставревски да престанат да ја дезинформираат македонската јавност во врска со економските состојби во земјата, бидејќи македонските граѓани се тие кои, во крајна инстанца, ќе треба да ги вратат долговите што ќе ги остави оваа власт зад себе.