Владимир Тодоровиќ, кандидатот за градоначалник на општина Центар и сопственик на ланецот маркети Тинекс имал фирма во Бугарија, но не ја пријавил во анкетниот лист на Антикорупциската комисија.
Според податоците на Трговскиот регистар во Бугарија, Тодоровиќ фигурира како сопственик на фирмата Тинекс БГ, која е основана на 4 септември 2009 година со седиште во градот Банско, а адреса за контакт со бугарската Национална агенција за приходи е во градот Разлог. Основачкиот капитал на фирмата е 5.000 бугарски лева или околу 2.500 евра. Како управител на фирмата за води лицето Љубе Јаневски.
Запрашан на денешната прес конференција зошто фирмата ја нема во анкетниот лист, Тодоровиќ одговори интернет страницата на бугарскиот централен регистер не е апдејтирана. Подоцна, во соопштение до јавноста општина Центар информираше дека Тодоровиќ немал обврска да ја пријави таа фирма.
-Согласно Законот за спречување на корупција Член 34, обврска За пријавување промена во имотната состојба имаат избрани и наименувани лица само за секое ЗГОЛЕМУВАЊЕ НА ИМОТОТ во вредност што надминува износ од 20 просечни плати во претходниот три месечен период на ниво на држава.
Фирмата која е регистрирана во Бугарија е регистрирана без основачки влог, И НЕ Е АКТИВНА ,согласно гореспоменатиот член за истата немам обврска да ја пријавам во Државната комисија за спречување на корупција, пишува Тодоровиќ.
Сепак, на страницата на бугарскиот централен регистер е впишан основачкиот влог, иако тој не надминува 20 просечни плати.