Директорите кои не биле затекнати на работните места во петокот при инспекциските контроли, ќе бидат повикани на разговор во Министерството за здравство.
Министерот Тодоров од нив ќе побара да му објаснат зошто не биле на работа кога дошле контролите.
Доколку немаат оправдана причина за нивното отсуство директорите ќе бидат казнети парично, а тие пак се должни да поведат дисциплински постапки за вработените кои исто така не го почитувале работното време и не биле затекнати на работа кога дошле инспекторите од ДСЗИ.
Вината за неодговорно однесување на вработените Тодоров ја гледа кај директорите.
-Не само да седат во удобни кожни фотељи, туку да бидат на своите работни места и да се посветат на работата. Доброто однесување на директорот е добар пример за вработените, а негативниот се одразува лошо и на однесувањето на лекарите изјави Тодоров.
Инспектори на ДСЗИ во петокот при крај на работното време ненајавено влегле во неколку клиники, а во три од нив не ги пронашле директорите на своите работни места, како и дел од вработените. Непочитување на работното време имало на Клиниката за кожни болести,за ревматологија и гастроентерохепатологија.
Поради ваквото неодговорно однесување Државниот инспекторат ќе ги засили контролите во јавните здравствени установи.
Покрај работното време, ќе се проверува и дали здравствените организации, вклучувајќи ги и приватните, ги обновиле дозволите за работа, обврска која треба да ја завршат најдоцна до 29 јуни.
Фондот за здравство со оние кои нема да го испочитуваат законскиот рок, нема да склучува договори, а може да ја изгубат и дозволата за работа.
Досега од околу 4.000 здравствени установи само 700 поднеле барања до министерството, за обновување на дозволата за работа.