Американскиот претседател Доналд Трамп денеска во Белата куќа се сретна со украинскиот претседател Володимир Зеленски, каде што рече дека е само посредник во преговорите за ставање крај на војната во Украина.
Јас сум посредник, јас сум и за Украина и за Русија. Сакам да се реши тоа, рече Трамп.
Зеленски го повика Трамп да не прави „никаков компромис со убиец“ и ја истакна важноста на „клучната“ поддршка што ќе гарантира одржливост на секој мировен договор.
Запрашан за неговата порака до сојузниците во НАТО од централна и источна Европа, кои се загрижени за експанзионистичката политика на Путин, Трамп рече дека е усогласен и со Путин и со Украина, во спротивно би било невозможно да се постигне договор и дека одбива да „зборува ужасни работи за Путин“, што, како што тврди, би ги отежнало преговорите.
Јас не сум на ничија страна. Јас сум на страната на Соединетите Американски Држави и на доброто на светот, рече Трамп.
Во еден момент од средбата Трамп му рече на Зеленски дека „мора да биде благодарен“ и го обвини дека „се коцка со трета светска војна“.
Трамп рече дека договорот за минерали меѓу Украина и САД ќе биде потпишан на прес-конференција што ќе се одржи подоцна, додавајќи дека го смета договорот за „многу фер“ и дека планира да ги користи ретките материјали „за сè што правиме, вклучително вештачката интелигенција и военото оружје“.
Тој нагласи дека суштината на новиот договор е дека „нема да им се вратите на борбите“.
Би-би-си пишува дека за време на средбата, американскиот потпретседател Џеј Ди Венс го обвини Зеленски дека „го изнесува случајот пред американските медиуми“ и рече дека неговите коментари се „без почит“.
Дали барем еднаш се заблагодаривте, праша тој, стои во извешатаите на агенциите.
Американскиот лидер порача дека Европа и НАТО мора да преземат поголема одговорност и да ги зголемат трошоците за одбрана.
На прашањето за источното крило на НАТО во поширок контекст, Трамп ја нарече Полска како „примерен сојузник“ и истакна дека ѝ е „многу посветен“ на таа земја.
Американскиот претседател ги пофали „неверојатно храбрите“ украински војници и им припиша „голема заслуга“ што три години се борат со руската агресија.
Американскиот претседател рече дека Украина ќе мора да направи одредени компромиси, но само затоа што „не е можен договор без компромиси“, додавајќи дека тие „нема да бидат толку големи колку што некои мислат дека ќе мора да направите“.
За време на состанокот, новинар од руската новинска агенција ТАСС беше отстранет од Овалната соба, каде што се одржуваше средбата поради тоа што рускиот државен медиум не бил на одобрениот медиумски список за средбата на Трамп со Зеленски.