Милијардерот и кандидат за место кај Републиканците, Доналд Трамп, во втората телевизиска дебата меѓу републиканските претенденти за Белата куќа, беше критикуван поради неговото мало искуство во политиката од сите учесници.
15 Републиканци се тркаат за номинација за изборите во 2016 година, а на втората средба пред првичните избори во Републиканската партија беа поканети 11 кандидати да говорат во претседателската библиотека Роналд Реган во Калифорнија.
Поранешната извршна директорка на Хјулит Пакард, Карли Фиорина, единствена жена меѓу републиканските претенденти, ги коментираше изјавите на Трамп, изјавувајќи: „Сите жени во земјата јасно слушнаа многу од тоа што тој го кажа“, повикувајќи се на неговата изјава дека “кога би ја погледнале, луѓето не би гласале за неа“.
На прашањето поврзано со Русија, сенаторот од Флорида, Марко Рубио рече дека рускиот претседател Владимир Путин се обидува да ги помести САД како прва сила на Блискиот Исток, а неговиот американски колега Барак Обама му дозволува тоа да го прави.
За темата за нуклеарниот договор со Иран, сенаторот Тед Круз се закани да го искине на парчиња „катастрофалниот договор“.
Сенаторот од Кентаки Ранд Пол рече дека ќе биде многу загрижен, ако Трамп биде одговорен за американскиот нуклеарен арсенал, имајќи предвид колку невнимателни изјави прави.