Претседателот на САД, Доналд Трамп поради заразувањето со коронавирусот е префрлен во воена клиника. Тој напуштајќи ја Белата куќа на присутните новинари им покажа „палец нагоре“ и ги поздрави со раката. Трамп со маска на лице и во придружба на соработници помина неколку метри одалеченост до хеликоптерот со кој потоа беше префрлен во воената болница Валтер Рид во Бетезда, северно од Вашингтон.
„Мислам дека ми оди многу добро“, рече Трамп во кусата видео порака снимена во Белата куќа, која ја објави на неговиот Твитер профил. Тој, како што рече, поради претпазливост заминува во болница. Неговата сопруга, како што додаде, се чувствува „многу добро“.
Од Белата куќа соопштија дека засега нема да го менува потпретседателот Мајк Пенс, кој по автоматизам би требало да ја преземе неговата функција, доколку Трамп не може да ги извршува своите службени должности. Пенс имаше негативен тест на коронавирусот, пишува DW.
Мерки за претпазливост по препорака на лекар
Според информациите од Белата куќа, престојот на Трамп во болница е мерка на претпазливост која ја препорачале лекарите. Тој, како што е соопштено, својата функција во наредните денови ќе ја извршува од претседателската канцеларија во клиниката.
Трамп по инфекцијата, како што е соопштено, имал „благи симптоми“ и работел цел ден. Се наведува и дека од петокот имал температура со кашлица. Соопштено е и дека тој покажува знаци на замор, но оти бил расположен.