Лидерите на Европската Унија (ЕУ) едногласно се сложија за листата со мерки против Русија поради нејзиното признавање на украинските региони за независни републики и распоредување на трупи на истокот на земјата. Мерките би требало да стапат во сила вечерва, како дел од одговорот на ЕУ на потегот на рускиот претседател Владимир Путин кој, сепак, нема да биде погоден од санкциите, пренесува „Франс 24“.
По вчерашната објава на Путин, следеше и негов потпис на декрет за распоредување на руски трупи во Доњецк и Луганск кои ги нарече „мировници“. Неговиот потег наиде на осуда од меѓународната заедница.
Европската Унија предупреди на масовни последици по руската економија, доколку Москва ја нападне Украина.
Германија претпладнево го запре процесот за одобрување на сертификација на гасоводот „Северен тек 2“ од Русија.
Претседателот на Европскиот Совет, Шарл Мишел и претседателката на Европската Комисија, Урсула фон дер Лајен истакнаа дека во нацрт предлогот се наведува оти мета на санкции ќе бидат сите оние кои биле вмешани во „незаконската одлука“ за Украина.
Вклучени се и банки кои ја финансираат руската војска, но и други операции на тие територии.
Од ЕУ соопштија дека ќе осуетат можност за руската држава и влада да пристапат до капитал и до финансиските пазари и услуги на Унијата. Покрај тоа, со санкциите ќе се „гаѓа“ и трговијата од Доњецк и Луганск со ЕУ.
Високиот претставник на ЕУ за надворешни работи и безбедност, Жосеп Борел рече дека руските постапки кон Украина „нема да останат без одговор“ и „дека ќе ги заболат“.
Според неговите зборови, мета на санкциите на ЕУ ќе бидат 27 лица и други субјекти. Сите членови на руската Дума, на долниот дом на парламентот, ќе бидат погодени со мерките кои обично вклучуваат забрана за патувања и „замрзнување“ на имот.