Општина Македонска Каменица прогласи тридневна жалост по повод смртта на тројцата млади мажи кои загинаа во сообраќајна несреќа во Италија. Во директен судир во градот Ница Монферато, во италијанската провинција Асти, дел од регионот Пиемонт, загинаа тројца македонски и еден италијански државјанин. Од Македонска Каменица загина З. С. (33), од село Саса А. К.(31), а В. И. (30) од село Пекљани, Виничко.
Тие се наоѓале на привремена работа во Италија.
„11,12 и 13 април ќе бидат денови на жалост во чест на нашите сограѓани кои загинаа во сообраќајна несреќа во Италија. Тие млади и примерни луѓе секогаш ќе останат меѓу нас. Општината ќе излезе во пресрет на семејствата“, велат од општината Македонска Каменица.
Од македонското Министерство за надворешни работи соопштија дека претставниците на конзулатот и амбасадата во Италија веќе се во контакт со дел од семејствата на починатите, и ќе бидат на располагање за помош при преносот на телата на загинатите од Италија.