– Образовниот процес покажа дека брзо може да се трансформира. Речиси цела учебна година имаме одлична интеракција и комуникација помеѓу наставник и ученик, што за нашата држава е голем отскок во однос на она што беше минатата година, рече Царовска на онлајн конференцијата што ја организираше Центарот за управување со промени и на која беа презентирани електронските услуги изработени во соработка со министерствата за образование и наука и за информатичко општество и администрација, во рамки на проектот „Дигитализација во јавниот сектор во РСМ за непречено функционирање“.
Проектот како што информираат од ЦУП е финансиран од Владата на Обединетото Кралство и поддржан од Британската амбасада во Скопје.
Царовска изрази задоволство од услугите што се достапни дигитални во рамки на проектот што го спроведува ЦУП, со кои се заштедува и време и нема застој во остварување на правата, посочувајќи го притоа нострифицирањето на дипломи кое сега е возможно за еден ден.
Смета дека треба да се подигне свеста за корисноста на новиот начин на услуги зашто се уште постои недоверба, па голем дел од студентите доаѓале во МОН за да се осигураат и да добијат архивски број дека аплицирале.
Министерката ги повика родителите да ја искористат можноста за дигитално запишување во основното образование за наредната учебна година, нова дгитална услуга која ќе почне да се применува во мај, со што, рече, ќе се избегне и метежот во училиштата.
Очекува дека ваков современ пристап ќе има и за упис во средното образование, дека во наредниот период ќе се дигитализираат и сите услуги поврзани со конкурсите за наука.
Следен предизвик на кој ќе се работи, додаде Царовска, е родителите да имаат можност неделно да добиваат од училиштата извештаи од Е-дневникот за напредокот на ученикот преку автоматизирана апликација на нивните мобилни телефони.