Следната криза во Европа, како и многу пред тоа, би можела да започне на Балканот. ЕУ и НАТО се обидуваат да привлечат земји како што се Србија и Црна Гора, но се соочуваат со борба за влијание во регионот со земји како што се САД, Русија, Турција, па дури и Саудиска Арабија, пишува германскиот весник „Ханделсблат“ , во текстот „ЕУ, Русија и Турција се борат за влијание на Балканот“.
Турција и Русија, пишува весникот, го шират влијанието толку што австрискиот министер за надворешни работи Себастијан Курц ја повикува ЕУ да го „врати Балканот во нејзината орбита”.
Говорејќи за Ханделсблат, Курц предупредува на зголеменото влијание на Турција и Саудиска Арабија.
“Во Сараево и Приштина, на пример, жените се платени да бида целосно покриени на јавните места”, вели австрискиот министер за надворешни работи, додавајќи: “Не можеме да гледаме и да не правиме ништо”.
– ЕУ, и покрај тоа што во моментов е вознемирена од случувањата како што се Брегзит, миграциската криза или тероризмот, не смее да го „испушти од вид“ Западен Балкан, изјави Курц.
Тој потенцира дека во регионот повторно е забележан раст на тензиите меѓу земјите.
– Поради тоа мора и натаму да играме активна улога во овој, за Унијата, многу важен регион. Мора да ги поддржиме реформите и борбата против радикализацијата, како и да понудиме веродостојна европска перспектива, заклучи Курц.
Во анализата, весникот појаснува дека освен историската поврзаност на Турција со регинот, забележителна е и нагласена економска агенда на Анкара, особено последниве години. Изминатите месеци Турција инвестира во рударските капацитети на Косово, договорена е соработка со авиокомпанијата во Албанија и во мај потпишан е нов договор за слободна трговија со Босна. Во јавните изјави за Балканот, Турција ја истакнува својата улога како стабилизирачки фактор во регионот.
Според весникот, Русија е уште еден играч во „тешка категорија“ на балканската сцена. Тука се посочуваат блиските односи со својот традиционален сојузник Србија, кои не се само благодарение на нивната заедничка словенска култура и православна религија: анкетите покажуваат дека повеќето Срби се про-руски определени и негативно настроени кон НАТО, што според весникот се должи на бомбардирањата во 1998 година. Весникот ја посочува и изјавата на заменик-премиерот на Русија, Дмитриј Рогозин при неодамнешната посета на Белград дека “Србија никогаш нема да стане членка на ЕУ. ”
Како илустрација на длабоката руска инволвираност на Балканот, германскиот весник го посочува случајот со обидот за државен удар во Црна Гора непосредно пред изборите, за што се обвинети неколкумина руски и српски државјани.
Во однос на Македонија се истакнува изјавата на министерката за одбрана Радмила Шеќеринска дека земјата сака да го забрза зачленувањето во НАТО во услови на “руски обиди за влијание во нашата политика и безбедност”, што Москва го отфрли како русофобија, пишува „Ханделсблат“.