Утринава премиерот Заев повикал на средба двајца министри, неколку директори на агенции, први лица во обвинителствата и судовите, дознава ТВ 24.
На средбата, премиерот барал детални информации за чекорите кои институциите ги преземале пред и за време на бегствотона Мијалков, како и за можните пропусти во постапките.
Според извори на Телевизијата, во кабинетот, на средбата имало јасни и високи тонови, додека институциите покажувале со прст една на друга.
Заев бил видно лут, па дури и се заканил дека доколку не се пронајде Мијалков, ќе има итни разрешувања, а од останатите јавно ќе побара одговорност.
Средбата наводно завршила во нервозна атмосфера, во очекување на расплет во наредните 3-4 дена, колку што Заев дал рок за резултати.
Сашо Мијалков, кој беше првообвинет во случајот „Таргет-тврдина“ завчера избега, и од тогаш е недостапен за органите на прогонот. Во меѓувреме, по него е распишана и домашна и меѓународна потерница.