Кинотека на Македонија изврши дигитализација на филмскиот опус на режисерот Љубиша Георгиевски и седумте филмски проекти ги смести на ДВД издание кое ќе биде промовирано в среда, во 12 часот во киносалата на Кинотека. Промоцијата се поклопува со годишнина од 55 години творештво и 77 години од раѓањето на режисерот. Освен тоа истиот ден ќе биде и книгата „Театарски магии – Мнемопис“ со текстови на авторот.
Комплетот од пет ДВД-ја ги содржи долгометражните „Под исто небо“ (1964), „Планината на гневот“ (1968), „Републиката во пламен“ (1969) и „Цената на градот“ (1970), краткометражните „Не“ (1966) и „Патека“ (1967), како и документарниот филм „Hic transit gloria mundi / Хераклеа“ (1974), а произлезе од проектот на Кинотеката на Македонија за дигитална реставрација на најдоброто од македонската национална филмска продукција.
Во рамки на овој проект досега беа дигитализирани и издадени филмовите на Столе Попов и на браќата Манаки, а во тек е дигитализацијата на филмските остварувања на Милчо Манчевски.