Кинтеро беше еден од тројцата основачи на моќниот картел Гвадалахара. Тој беше 28 години во затвор за убиството на поранешниот агент на американската Агенција за борба против дрогата (ДЕА) Енрике Камарена.
Мексиканскиот нарко бос Рафаел Каро Кинтеро, кој се наоѓа на листата на најбарани во САД, е уапсен во северозападната држава Синалоа, соопшти мексиканската морнарица.
Кинтеро, за кој се претпоставува дека има 69 години, е обвинет за киднапирање, мачење и убиство на американски агент во 1985 година, а притворен е во градот Шоис.
Морнарицата соопшти дека Кинтерo бил пронајден во грмушки од специјално тренирано куче по име Макс. САД соопштија дека ќе бараат негова итна екстрадиција.
– Нема скривалиште за некој кој киднапира, мачи и убива член на американската полиција. Длабоко сме благодарни на мексиканските власти за пронаоѓањето и апсењето на Рафаел Каро Кинтеро – изјави американскиот државен обвинител Мерик Гарланд.
Мексиканската морнарица соопшти и дека 14 нејзини членови загинале по пад на хеликоптер Black Hawk во градот Лос Мочис во Синалоа. Истрагата беше во тек, но нема индикации дека несреќата е поврзана со апсењето на Кинтеро.
Во меѓувреме, вишиот советник за Латинска Америка во Белата куќа, Хуан Гонзалес, твитна: „Ова е огромно“.
Кинтеро беше еден од тројцата основачи на моќниот картел Гвадалахара. Тој помина 28 години во затвор за убиството на поранешниот агент на американската Агенција за борба против дрогата (ДЕА) Енрике Камарена.
Убиството ги затегна односите меѓу САД и Мексико во тоа време, а подоцна беше прикажано во серијата на „Нетфликс“ – „Наркос: Мексико“.
Во 2013 година, судот во Мексико ја намали 40-годишната затворска казна на Кинтеро и го ослободи, пресудувајќи дека требаше да му се суди пред државен, а не федерален суд. Пресудата подоцна беше поништена од Врховниот суд на земјата, но Кинтеро веќе се криеше.
Американските власти рекоа дека тој брзо се вратил на шверцот со дрога, а Вашингтон подоцна понуди награда од 20 милиони долари за секоја информација што ќе доведе до негово апсење.
Апсењето на Кинтеро е симболично важно, иако тој повеќе не се смета за главна фигура во меѓународната трговија со дрога.