Припадниците на Специјалната полиција на Црна Гора, го уапсија Блажо Јованиќ по претресот извршен во неговата канцеларија.
Претседателот на Стопанскиот суд на Црна Гора, Блажо Јованиќ и уште десетина лица во повеќе црногорски градови се уапсени денеска по налог на Специјалниот државен обвинител, јави ТВ Вијести.
Јованиќ е осомничен дека е организатор на криминална група која во претходните години со злоупотреба на службената положба и други кривични дела ја оштетила државата за десетици милиони евра.
Министерот за внатрешни работи Филип Аџиќ ја поздрави денешната акција на Полициската управа, по наредба на главниот специјален обвинител Владимир Нововиќ, во која беше уапсен претседателот на Стопанскиот суд на Црна Гора со најава дека е ова само почеток.
„Денешните, како и неодамнешните акции, се најдобар показател за посветеноста и бескомпромисната борба против организираниот криминал и корупцијата, што е поставено како еден од клучните приоритети на владата“, рече Аџиќ.