Управата за јавни приходи и антуикорупциската комисија под полна пареа работат на двете прекршочни постапки во врска со имотот на кандидатот за градоначалник на скопската општина Центар од редовите на „Сојузот за иднината“, Андреј Жерновски, објавува Алфа ТВ.
Извори од овие две институции за „Алфа„ велат дека многу брзо може да се заврши процедурата по што ќе се знае на каков начин ќе се санкционира Жерновски, кој инаку се води како невработено лице, а поседува имот на кој можат да му позавидат и бизнисмени.
Медиумите деновиве обелоденија дека тој поседува три поголеми стана, како и удел во куќа во Дебар Маало кој не го пријавил во Антикорупциската комисија. Наводно, куќата на Ленинова ја завел само како градежно земјиште, а еден од становите не е наведен никаде. Еден од спорните моменти во целата оваа приказна е купопродажбен договор од кој се гледа дека Жерновски во 2007 година купил стан во елитната населба Водно од фирмата „Венекс“.