Српската полиција во средата го уапсила поранешниот функционер на украинската разузнавачка служба СБУ, Андриј Наумов, и близок соработник на украинскиот претседател Володимир Зеленски. Според првите информации, Наумов бил уапсен на граничниот премин Прешево со уште еден германски државјанин, наводно негов возач, под сомнение за перење пари.
За нивното апсење се огласи и српското МВР, кое наведува дека на преминот Прешево со Северна Македонија, граничната полиција кај овие лица пронашла 607.990 евра и 124.924 долари во готовина и два скапоцени смарагди. Тие не пријавиле ниту пари, ниту скапоцени камења, па се обвинети дека ги стекнале со криминални активности и се обиделе со нив да ја напуштат Србија. Наумов и неговиот возач се соочуваат со затворска казна од една до 12 години, но украинските медиуми објавија дека Наумов би можел да открие некои украински државни тајни во замена за неговата слобода.
Наумов на 31 март официјално бил разрешен од претседателот на Украина, Володимир Зеленски, под обвинение за велепредавство, бидејќи ја напуштил земјата непосредно пред руската инвазија и го испратил своето семејство во странство, објави Објектив.рс.