250.000 луѓе според полицијата, а 500.000 според украинската опозиција, се собрани на плоштадот на незавизноста “Мајдан Незалежности” во знак на револт против откажувањето на украинската влада да потпише договор за асоцијација и слободна трговија со Европската Унија.
Стотици манифестанти и полицајци се повредени во судирите.
Вечерва учесниците во киевските протестите ја заземаа контролата на зградата на општината на градот Киев, потврдија извори во полицијата на за новинската агенција АФП.
“Одговорните во безбедносните сили се во преговори со граѓаните кои ја запоседнаа зградата на општината и им објаснуваат дека нивните акции се нелегални и бараат од нив да ја напуштат зградата”, изјави портпаролката на полицијата, Олга Билик.
Манифестантите закачија транспарент на зградата на кој пишува “Генералштаб на Револуцијата”, јавуваат присутните новинари.
Масовните протести во улиците на Киев започнаа пред речиси една недела кога опозицијата повика на мобилизација во знак на револт против одлуката на претседателот Виктор Јанукович да не потпише клучен договор со ЕУ, кој требаше да ја зголеми трговската размена меѓу двата партнери и да ја доближи Украина до Унијата, како и да се укине визниот режим за украинските граѓани.
Еден од условите на ЕУ беше да се изгласа закон со кој ќе се пушти политичката затвореничка Јулија Тимошенко на лечење во Германија.
Мнозинството во украинскиот парламент одби да го изгласа клучниот закон, по што претседателот јавно порача дека е под притисок на Москва да не потпише договор со Европа.
Оттогаш масовни протести ја тресат оваа стратегиска земја од источното соседство на Европската Унија.
Руската агенција ИТАР ТАСС јави дека претседателот Јанукович размислува да воведе вонредна состојба во државата поради последните случувања.
ЕУ ги повика демонстрантите да протестираат мирно, а полицијата да не употребува сила. Унијата е подготвена во секој момент да го потпише клучниот договор со Украина, штом претседателот Јанукович изрази волја за тоа.
Следните редовни претседателски избори во Украина се закажани за 2015, но демонстрантите гласно бараат тоа да се случи пред време.