Неколку илјади украински студенти се вклучија во протестите во центарот на Киев против неочекуваната одлука на Владата да ги прекине подготовките за потпишување на Спогодбата за асоцијација со Европската унија и да се ориентира кон Русија.
Околу три илјади студенти од Киевскиот универзитет ги напуштија предавањата и излегоа на улиците во Киев, приклучувајќи се кон неколку илјади лица, кои протестираат веќе два дена на централниот плоштад.
Демонстрантите го повикаа претседателот на Украина Виктор Јанукович да ја промени одлуката и да ја потпише Спогодбата со ЕУ на самитот во Вилнус в петок.
Украина минатата недела ги прекина подготовките за потпишување на Спогодбата, откако Русија воведе трговски ограничувања и се закани со други соодветни мерки.
– Русија е причина за одлуката на Украина да се откаже од потпишувањето на договорот за асоцијација со ЕУ, призна претходно денеска украинскиот премиер Микола Азаров.
Според него, Русија предложила да биде одложено потпишувањето, кое требаше да се случи оваа недела во Вилнус и наместо тоа да започнат преговори меѓу Москва и Киев.
На прес-конференција во украинскиот главен град, Азаров истакна дека следниот месец неговата земја ќе започне преговори со Русија за изработка на патоказ за обновување на меѓусебните односи, нагласувајќи дека Киев не ги завршил разговорите со Москва за дозволување на нов руски кредит.