Театарската претстава на нашиот Оливер Мицевски “Улица на мравките” работена според текстот на познатиот германски драмски автор Роланд Шимелфениг е селектирана за CPH Stage, најзначајниот театарски фестивал во Данска кој што се одржува секоја година во Копенхаген.
Фестивалот ги прикажува најдобрите и најиновативни претстави во Данска од тековната театарска сезона. Ова е прв пат во историјата на фестивалот, да биде селектирана претстава на македонски режисер.
“Улица на мравките” е театарска фантазија која што се случува во Куба и го следи животот на едно семејство од предградијата на Хавана, кое што под сплет на мистериозни околности, на магичен начин добива можност да ги оствари сите свои желби.
Претставата е во продукција на Oliver Micevski’s Theatre Company од Данска. Дизајнот е на Жанета Вангели, а играат актери од Унгарија, Англија, Мексико и Костарика.
Мицевски и е веќе познат на скандинавската публика со неговата постановка на “Норвешка денес” во Nordic Black Theatre во Осло, со нашиот Бесим Јакупи во главната улога. Во изминативе години, Мицевски работи во Данска, Унгарија, Франција и неговите претстави со голем успех се играат на сцените на најзначајните европски театри.
Се надеваме дека наскоро и македонската публика ќе има можност да ужива во некоја од претставите на Мицевски, коишто најголемиот светски театарски портал “The Theatre Times” ги опишува како “исклучително автентични, вознемирувачки и интелектуално стимулира чки театарски претстави”