Унгарскиот популистички премиер Виктор Орбан во вторникот отвори дебата за воведување на смртна казна во оваа земја. Оваа казна е тотално забранета во земјите членки на ЕУ и е еден од првите предуслови што една земја треба да ги исполни за да стане членка на ЕУ.
“Прашањето на смртната казна треба да биде вратено на дневниот ред на Унгарија”, изјави Орбан пред медиумите додавајќи дека унгарското законодавство не е доволно реперсивно и покрај тоа што е оценето како едно од најстрогите во Европа со доживотни затворски казни кои не можат да бидат скусени.
Оваа реакција на Орбан дојде по убиството на еден човек во Капосвар на југот на Унгарија а тој беше поттикнат и од барањата на екстремната десница во оваа земја.
Оваа изјава ја шокираше целата ЕУ која потсети дека повторното воведување на смртната казна ќе донесе санкции за Унгарија како суспензија на правото на глас во рамките на Советот на ЕУ.
Претседателот на Европскиот парламент (ЕП) Мартин Шулц изјави дека побарал да разговара со Орбан за да му каже дека неговиот предлог не е одговор на проблемите а истата реакција дојде и од Европската комисија (ЕК).
“Ова е сосема спротивно на европското право и претставува варварство”, изјави австрискиот пратеник Јорг Лихтфрид во Европскиот парламент и побара од ЕУ јасно да стави на знаење дека овој предлог е тотално неприфатлив за земја членка на ЕУ. Неговата изјава предизвика силен аплауз за време на пленарната сесија на ЕП во Стразбург каде што се наоѓаше и претседателот на ЕК Жан-Клод Јункер кој исто така ја поздрави оваа осуда на зборовите на Орбан.
Реакција дојде и од комесарот за човекови права на Советот на Европа: “Страшно сум загрижен поради популистичкиот тренд на политичкиот говор во Унгарија. Идејата за воведување на смртната казна за која зборуваше премиерот Орбан е некомпатибилна со унгарските обврски во рамките на Европската конвенција за човекови права и со вредностите за кои Европа се бори”, рече тој.
Откако повторно дојде на власт во 2010 година, Орбан полека но сигурно воведува мерки кои ја намалуваат слободата на медиумите, независноста на судството и одбраната на човековите права. ЕУ и унгарското граѓанско општество постојано реагираат на овие нарушувања на европските вредности врз кои е базирана европската градба.