Во време кога земјата се соочува со зголемен број на заразени со Ковид-19 училиштата да бидат последни што ќе се затворат, а први што ќе се отворат кога за тоа ќе се создадат безбедни услови. Затворањето на училиштата треба да се разгледува единствено тогаш кога нема други алтернативи, повикува Патриција ди Џовани, претставничка на УНИЦЕФ во Северна Македонија во писмена изјава до медиумите.
-Кога се размислува дали да се укине наставата со физичко присуство треба да се направи добра проценка за придобивките наспроти ризиците имајќи ги предвид здравствените, образованите и другите социо-економски фактори. Она што со сигурност го знаеме е дека затворањето на училиштата има јасни негативни ефекти врз здравјето, образованието и развојот на децата, семејниот приход и вкупната економија, вели Ди Џовани.
Таа додава дека затворањето на училиштата не претставува значаен фактор за намалувањето на пренесувањето на вирусот и тие не се главен двигател за ширењето на Ковид-19.
-Светските примери покажуваат дека почитувањето на засилените мерки за превенција во училиштата и навременото откривање и изолирање на случаите и нивните контакти, во повеќето ситуации, досега се покажа успешно во спречувањето на растот на бројот на новозаразени. Во земјава, според податоците објавени од Министерството за образование и наука од повторното отворање на училиштата се заразиле само 0,05 проценти од учениците и 0,6 проценти од наставниците што одат во училиште со физичко присуство. Ова укажува на фактот дека училиштата веројатно не се главниот двигател на ширењето на Ковид-19, особено кога во нив соодветно се применуваат пропишаните превентивни и заштитни мерки. Освен тоа, глобалните студии за рано моделирање сугерираат дека од сите мерки за социјално дистанцирање затворањето на училиштата не претставува значаен фактор кон намалување на пренесувањето на Ковид-19 во заедницата. Исто така, досегашните студии покажуваат дека кај децата под десет години е помал степенот на распространување на вирусот отколку кај поголемите деца, пишува Ди Џовани.
СОНК вчера побара зголемување на платите за наставниците поради зголемиот број на работни часови, но и работа на наставниците кои држат часови со физичко присуство од дома. Министерката за образование и наука, Мила Царовска порача дека засега останува постојниот модел за одржување на наставата, учениците од прво до трето одделение да следат настава во физичко присуство.