На 7 октомври по 13 пат во Скопје ќе се одржи „Бела Ноќ“, а организаторите најавуваат „поскромна“, но квалитетна програма, насочена низ неколку точки во градот.
Во Галеријата на Младинскиот кулрурен центар – МКЦ ќе биде големата изложба на генијалниот Салвадор Дали, кој ги илустирал познатите басни како „Гавран и лисица“, „Коњи и волк“, „Лавовиот двор“, „Болниот елен“. Оваа серија бакрорези е создадена во 1974 година и е печатена на 250 графички табли, кои се чуваат во многу галерии низ целиот свет.
Ќе бидат изложени и дела од опусот „Вечерите на Гала“, „Божествена комедија“, и познатите Далиеви коњи, како и една скулптура во позлата, наречена „Жена жирафа“. Вкупно 29 дела од овој мајстор на уметноста. Изложбата е организирана во соработка со уметничката галерија „Висконти“ од Љубљана и Централноевропскиот културен центар од Нови Сад.
На Плоштадот Македонија, во 21:00 часот, корејската трупа Tago&АtoBIZ ќе го претстави својот музички спектакл, перформансот „Таго: Корејски тапан 2“, кој е виден во целиот свет, на сите континенти, на најпрестижните театарски фестивали во Европа и светот. Перформансот на 30-ина актери, танцувачи, изведувачи и членови на оваа светска атракцијаќе трае 70 минути.
Ова гостување во рамките на Бела ноќ е во соработка со фестивалот МОТ, т.е. во МОТ+ програмата.
Во горното фоаје на кино Фросина, во Младинскиот Културен Центар ќе биде поставена изложбата „Сексот и револуцијата“. Авторскиот тим Катерина Станковиќ – Бјеговиќ, ликовна уметничка и Јелена Живковиќ, историчарка, ги претставуваат љубовните тајни на некои од најголемите имиња на револуциите.
Жените ги кратат косите и здолништата, а мажите бараат карта повеќе за последното седиште во кината. Роза Луксембург во Берлин му пишува на драгиот Лео писма и бара повеќе секс, заедно со револуцијата. Марлен Дитрих игра на шанк на геј-клубовите и носи различни жени и мажи во кревет. Врвот на сексуалната револуција бил во 60-те, низ социјално превирање и антивоеното движење.
На платото на Младинскиот културен центар ќе настапат:
– Barbarisms – тричлен бенд од Стокхолм, предводен од американскиот композитор Николас Фараоне;
– Conquering Lion – даб/реге/кросовер бенд од Тетово, кој своето творештво го започнува во април 2007;
– Ninos Du Brasil – перкусионистичко италијанско дуо, со позадина од бразилската карневалска музика;
Во Дансинг салата на МКЦ свој настап ќе имаат:
I TPAME I TVRAME од Албанија, промоција на албумот Future Attitude
UJ PA GAZ од Албанија, LIVE
KANTON6 од Скопје, LIVE
NINO NAUMOV од Скопје, DJ Set
Во Џебното Кино на МКЦ најавен е соло-настапот на Alex Jønsson од Данска, наградуван гитарист, композитор и импровизатор.
Во рамките на филмскиот маратон во кино Милениум ќе биде прикажан новиот филм на режисерката Теона Стругар Митевска.
Возењето во градските автобуси на ЈСП кои сообраќаат кон централното градско подрачје, од 19:00 часот до раните утрински часови, исто, ќе е бесплатно.