ГТЦ ФОРУМ е трет од серијата настани како реакција на проектот за нова фасада и доградба на Градскиот трговски центар со кој целосно би се уништила архитектурата на објектот, како и неговата урбанистичка улога на „улица“ низ централното градско јадро.
Десетина интелектуалци ќе говорат за значењето на Градскиот трговски центар утре во паркот „Жена Борец“ во 20 часот во рамки на иницијативата „Го сакам ГТЦ“. Меѓу потврдените имиња се Никос Чаусидис, професорите и архитекти Доминика Бошкова и Гоце Аџимитрески, новинарот Александар Писарев и многу други. Асоцијацијата на Архитекти на Македонија, преку социјалната мрежа Фејсбук ги повика граѓаните утре масовно да се приклучат на овој настан насловен како „Форум ГТЦ“.
„70% од објектот на ГТЦ е јавен простор. Тој, архитектонски, претставува „реплика“ на агора/форум, која ги канализира и физички ги опслужува општествените потреби на граѓаните на Скопје во последните четири децении. Во таа смисла, ГТЦ ФОРУМ претставува надоврзување на основната функција на овој објект како јавен простор“, посочуваат од Асоцијацијата на архитекти на Македонија кои со низа активности трет петок по ред бараат спас на ГТЦ.
Пред споменикот на Славко Јаневски во паркот утре ќе и се даде збор и на публиката, а истовремено ќе продолжат да се собираат потписите против рефасадирањето на ГТЦ.
Граѓаните повторно ќе можат да остават анонимна порака до управата на ГТЦ, а ќе можат и да купат маичка „Го сакам ГТЦ“ за 250 денари.