Премиерот Никола Груевски го тужи претседателот на НСДП, Тито Петковски за клевета затоа што во октомври минатата година за неделникот Фокус изјавил дека Груевски со официјално писмо до генералниот секретар на Обединетите Нации во 2008 предложил новото име да биде Република Македонија – Скопје.
Тоа се измислени факти, се вели во во тужбата, во која се бара Петковски да плати отштета во висина од 15 илјади евра за нанесување штетна на честа и угледот на Груевски, јавува телевизија Телма.
“Мојот предлог Груевски јавно да соопшти, односно да го повтори својот став од 2008 година, Груевски го доживеа како штетно по неговиот углед и чест.
– Особено што тужителот секогаш изјавува дека нема да прифати ниту едно решение за проблемот на името без спроведување референдум. Повредата на честа и угледот „кај тужителот предизвика јака душевна болка која може да се излекува само со 950 000 денари или со 15 000 евра.
– Се разбира таквата душевна болка нема наод на вешто лице – психијатар. Искрено, се до овој момент живеев во убедување дека парата не ја лечи душата,“ вели Петковски.
Тито Петковски вели дека Груевски продава лажен патриотизам наместо да ја обедини нацијата и државата барајќи консензус за прашањата од национален интерес и го повотри својот став дека додека Груевски е на власт, Македонија нема да влезе во Европската Унија и НАТО.
Првото рочиште по тужбата на премиерот Никола Груевски против Тито Петковски ќе се одржи утре.
Непосредно по прес конференцијата на Петковски од Центарот за комуникации на ВМРО – ДПМНЕ пристигна реакција:
– Изјавите на Тито Петковски ниту се пишувани од ВМРО-ДПМНЕ ниту му се сугерирани од ВМРО-ДПМНЕ туку, претпоставуваме дека се лично тврдење или став на господинот Петковски. Ако тој е сигурен во своите изјави и тврдења и ако не ја лажел јавноста нема зошто да се плаши од можноста да ги докаже истите во предвидена законска постапка. Тој е единствениот пратеник во македонското Собрание што на седница на Собранието побарал
промена на државното име на Република Македонија.
– Тито Петковски е еден од предводниците и гласноговорниците на опозицијата токму на оваа тема за спорот со Грција. Знаејќи ја неговата историја на ставови и неговите лични врски ние од него никогаш и не очекуваме поодговорен пристап, но јавноста ја заслужува вистината, се вели во соопштението од Центарот за комуникации на ВМРО-ДПМНЕ.