Премиерата на новата претстава на режисерот Владимир Милчин, „Денес не напишав ни збор“ ќе се одржи утре во Театарот за деца и младинци во Скопје.
Претставата е работена по извадоци од делата на Данил Хармс и „Сонот на разумот“ од Антонио Буеро Ваљехо,
„Вечната борба на уметникот со авторитетите, односот кон слободата, и гладта за истата, се некои од темите со кои оваа претстава се занимава, а сето тоа видено преку пресеци од животите на двајца великани, Хармс и Гоја.“, стои во најавата од Театарот за деца и младинци.
– Ние сакавме тие двајца да се сретнат во нивните животи, бидејќи сами по себе многу кажуваат за своите животи, а тоа што го кажуваат е дека времињата се менуваат, но владателите остануваат. Втората фасцинација е овој театар. Со никој друг ансамбл и никаде не би правел таков ризик, а сега слободно можам да кажам дека тој ризик се исплатеше. Актерите се отворени за работа, сакаат да работат за нешто што на сцената е непознато , изјави на денешната прес-конференција режисерот Милчин.
Во претставата играат актерите: Драган Довлев, Мартин Јорданоски, Мики Анчевски, Владимир Лазовски, Предраг Павловски, Ана Левајковиќ – Бошков, Татјана Павловска Кочовска, Бојан Кирковски, Наташа Петровиќ, Емра Куртишова и Симона Спировска.
Сценографијата е на Крсте Џидров, а костимограф е Марија Пупучевска.