Утре со почеток во 18 часот, пред хотелот Бристол ќе се одржи мирен протест насловен „Кислород”, со кој граѓанската иницијатива „Авангарда” ќе побара да се запре со сечење и на последните дрвца во Скопје, информираше Одделението за односи со јавност Општина Центар.
„Последен пат го видовме во паркот, под липите. Нашиот пријател што сите го познаваме, мисли дека е сам и го губи она што последно му остана. Зашто кога го тепаа ние не го одбранивме, го замолкнуваа а ние молчевме, кога му се потсмеваа мислеше дека и нам ни е смешно.
– Му забранија да раскажува за да ја заборавиме и ние нашата приказна. Мисли дека е заборавен, а нам ни недостасува. Тој, кој не потсетуваше нам и целиот свет што значи солидарноста”, вели во соопштението организаторот на настанот.
На едно место ќе се соберат граѓаните кои сакаат кислород за Скопје и активисти. Говорници ќе бидат Џелал Хоџиќ и Никола Наумовски. Свој настап ќе имаат и „Puk’kah”, „Da Dzaka Nakot” и „Strajk”, се додава во соопштението.