Белгискиот посредник во преговорите за спроведување на Договорот од Пржино Питер Ванхауте е оптимист дека е можно да се постигне договор меѓу партиите за преостанатите прашања – медиумите и прочистувањето на избирачкиот список.
Одговарајќи на новинарско прашање за предлозите што се на маса, Ванхауте рече дека е добро што има предлози, и дека тоа не значи оти се тоа крајни решенија, како и тоа дека некои од овие предлози не соодветствуват со европските стандарди.
Во однос на тоа дали има време се да се заврши до изборниот ден предвиден до Договорот, белгискиот посредник рече дека ако нема доволно време за подготовска на изборите, тоа ќе бидат проблематични избори.
За тоа дали е проблем ако најголемата опозициска партија не учествува на нив, тој вели дека избори кои не се инклузивни се проблем и за државата и за владејачката коалиција и за опозицијата.
Ванхауте рече дека се уште нема договор ниту за методологијата за прочистување на избирачкиот список, но дека му е драго што може да каже дека Државната изборна комисија прави се што може за прочистување на списокот.