Еврокомесарот за проширување Оливер Вархеи на Економскиот форум во Тирана го издигна на ниво на нов услов билатералниот спор со Софија, порачувајќи дека Македонија за него треба да најде „заеднички прифатливо решение со Бугарија“. Тој рече дека ЕУ ветила дека целиот Западен Балкан ќе биде дел од Унијата, но пропуштила да одговори позитивно кога земјите одговориле на барањата за реформи.
Сепак, тој се надева дека првата меѓувладина конференција за Македонија и за Албанија, која според него сега ги исполнува условите, ќе се одржи што поскоро и за време на португалското претседателство. ЕК, рече Вархеји, смета дека сите услови да се организира меѓувладината конференција со Албанија се исполнети, додека за Македонија порача дека го одржува темпото на реформите но важно е да најде брзо решение за спорот.
Според него успехот на земјите во наредниот период ќе се мери и низ нов параметар- колку успеале во санирање на последиците по пандемијата со Ковид 19.
Тој уверуваше дека Западниот Балкан се уште е приоритет на ЕУ и дека се надева дека блокадата што се случи во декември е привремена , а не трајна, но за тоа да се случи потребна е според него и соработка на земјите од Западен Балкан. Тој вети дека ќе го олеснува тој процес опишувајќи се себеси како политичар кој не сака многу да зборува туку да работи, порачувајќи истовремено до земјите кандидати за членки да ветуваат малку а да остваруваат многу.
Тој најави исто така дека во ЕУ се планира вклучување на земјите од Западниот Балкан во заедничкиот европски пазар пред да станат членки на Унијата.