Вечерва во 19:30 часот на плоштадот „Македонија“ во Скопје, ќе се одржи традиционалниот музички хепенинг „Биди и ти дел од ѕвезденото небо на Тоше”.
Оваа година, покрај познатите хитови на Тоше Проески, неговите фанови ќе имаат можност да ја слушнат и до сега необјавената песна на ромски јазик на Тоше Проески „Ефта пуране иконе“ (Седумте стари икони), како и долгоочекуваната верзија на песната „Малечка“ на англиски јазик.
Настанот се одржува по иницијатива на обожавателите на Тоше Проески, во спомен на прерано починатата македонска музичка ѕвезда, на денот на неговиот последен концерт во Скопје, со цел сите заедно да се потсетиме на неговата музика и лик, но и да создадеме „ѕвездено небо“ во негова чест.
Од фан-клубот на Тоше Проески ги покануваат сите кои се во можност да дојдат на плоштадот „Македонија“ вечер во 19.00 часот и заедно да се испеат рефрените.