Илјадници граѓани на Скопје масовно носат помош за настраданите од поплавите во Србија, БиХ и Хрватска на плоштадот „Македонија“ во центарот на градот каде што во организација на Црвениот крст на Македонија се поставени пунктови каде што граѓаните можат да ја остават помошта.
Супермаркетите и аптеките се полни со редици граѓани кои купуваат храна, продукти за хигиена, пелени, бебешки кашички и вода за нивните соседи и поранешни сограѓани од Југославија.
-Утрово уште рано за 5 минути се испразни целиот рафт со бебешки кашички. Буквално на секои 10 минути го полниме одново и одново. Истото е и со влажни марамици и со вода. Во еден момент снемавме вода, но повторно се донесе, вели вработена во скопки хипермаркет.
На плоштадот е полно со млади волонтери кои ја сортираат и пакуваат помошта, а потоа ја носат до камионите за транспорт. Млад 23-годишен скопјанец ни вели дека на плоштадот дошол да донесе помош со своето семејство, но кога слушнал дека се потребни возила за транспорт веднаш го ставил на располагање своето возило. Граѓаните кои доаѓаат да остават помош постојано се вклучуваат во групите волонтери. Одговорните од Црвениот крст, поради огромниот наплив на донации, повикуваат на помош од присутните.
-Ништо не ме чини, еве останав да пакувам со волонтерите во кутиите, вели млада скопјанка.
На средината на плоштадот стојат плочи со натпис „Скопје се сеќава“. Никола.Ц., раскажува дека тој бил жртва на земјотресот и овој повик за п0мош го доживеал емотивно.
-Јас една година немав кров на глава. Се храневме и облекувавме од помошта на граѓаните од целиот свет. Тогаш бев многу мал, но се сеќавам како вчера да беше. Знам низ што поминуваат тие луѓе и што допрва ги чека откако ќе помине шокот. Се чувствував одговрен да дојдам, вели 58-годишниот Никола.
На плоштадот се уште масовно пристигнуваат граѓани со полни ќеси и колички помош за настраданите. НОВА упатува повик до сите граѓани да помогнат во рамки на своите можности, но и внимателно да следат кои продукти се најпотребни. Од Црвениот крст информираат дека во погодените места во моментов најмногу недостигаат храна за бебиња, обична храна и средства за хигиена.