По 43 години членство во Европската унија, Велика Британија сака да излезе од европскиот клуб и се подготвува за референдум на 23 јуни.
Што ли и фали на Велика Британија во Унијата? Очигледно многу. Еве обид за кусо резиме.
Велика Британија никогаш не била многу среќна во својот брак со Унијата. Постарите се сеќаваат на европските згоди и особено незгоди со Маргарет Тачер која сметаше дека нејзината земја дава повеќе пари во Унијата отколку што добива назад. Нејзиното славно “I want my money back” (Ги сакам моите пари назад!) од крајот на 70 години е влезено во учебниците по европска историја. Патем, по неколку години инсистирање Тачер успеа да ги добие своите милијарди назад.
Но, да ја оставиме историјата.
Британците бараат подобра контрола на имиграцијата, подобра борба против тероризмот и враќање на британската сувереност, исклучително важна во британската култура. Поддржувачите на Брексит сакаат слободно да тргуваат со целиот свет без да внимаваат на европските регулативи. И се поддржувачи на Унија проширена на целиот континент.
По самитот во февруари посветен на Брексит, британскиот премиер Дејвид Камерон замина назад за Лондон со доволно напакувана торба за да може да се заложи“за”останување на земјата во ЕУ.
Во торбата има редуцирана социјална помош за европските работници како на пример детскиот додаток. Земјата ќе може да активира кочница кога ќе оцени дека миграциската пресија е пресилна. Камерон доби гаранција дека неговата земја нема да биде вовлечена во проекти кои водат во потесна европска интеграција. И успеа да се избори за заштита на лондонскиот финансиски центар од одлуките на евро зоната.
Накусо, Камерон доби специјален статус за Велика Британија. Што никого не изненади бидејќи оваа островска земја секогаш имала еден вид специјален статус и не е ни во Шенген ни во евро зоната.
– Место на масата на Европската унија, како во НАТО, е витален начин за проектирање на нашите вредности, влијание и сила во светот. Не зборува за национална гордост туку за нашите национални интереси. Британија е чудесна земја, петта најголема економија во светот и ние можеме да успееме во се што ќе преземеме. Но ако ме прашувате мене, како премиер веќе шест години, како да бидеме посилни и побезбедни сакам да бидам апсолутно јасен – нам ни е подобро внатре, вели Камерон.
Дали Камерон ќе ги убеди Британците ќе видиме на 23 јуни. Во меѓувреме Британците кои работат во Брисел и во ЕУ се сериозно загрижени. Ако Брекситот биде изгласан многу британски функционери ќе треба да се спакуваат и да си одат дома.
Тие надеваат дека францускиот министер за финансии има право кога вели дека Британците се доволно умни за да одлучат да останат во Унијата. А ако не се, тој им посака среќен пат!