Европската унија е во паника. Затоа што земјите членки, наместо да најдат решение за бегалската криза, се караат и се поделени како никогаш досега.
Белгија и Франција, вечни сојузници и верни пријатели, се скараа затоа што Белгија почна контрола на границата со Франција откако таа го затвори дивиот бегалски камп на Ла Манш кој го носеше сликовитото име “џунгла”.
Така Германија им се налути на Австрија и источните земји затоа што не прифаќаат бегалци, а Атина и се налути на Виена што го тераат Балканот да ги затвора границите и не бара мислење од Грција каде што десетици илјади бегалци се заглавени, помеѓу другото и на границата со Македонија.
Првиот човек на Унијата Доналд Туск ќе имаме чест да го видиме во Скопје на 2 март, па потоа ќе оди во Виена Загреб и Љубљана за да им каже дека нивните планови не се фер и дека треба да се инвестира во одржување на Шенген зоната а не во нејзино распаѓање.
Комесарот за миграција Димитрис Аврамопулос одлучи да го повиши тонот. Ако ова продолжи, целиот Шенген систем ќе се распадне а хуманитарната криза веќе е тука, рече тој.
– Да, на рутата на Западниот Балкан ситуацијата е критична. Можноста од широка хуманитарна криза е присутна, реална и мнoгу блиска. Ова не смее да се решава преку унилатерални, билатерални и трилатерални акции. Првите негативни ефекти се веќе видливи, рече Аврамопулос.
Taка, на ЕУ и останува само една недела да го реши проблемот. Идејата за решение е позната а за неа е заслужна Ангела Меркел. Таа гласи: договорот потпишан со Анкара уште во ноември треба да се активира на 7 март на европски самит со Турција. Анкара да ги земе бегалците а за возврат добива пари.
И додека сите паничат има една земја која моли да и се испратат, внимавајте – над 10.000 бегалци. Името на таа чудна држава е Португалија.
Земјата полека излегува од рецесија, невработеноста полека но сигурно се намалува а португалскиот наталитет е во драматичен пад.. За Португалија очевидно решение се бегалците кои треба да и дадат елан на економијата. И од уште една земја дојде добра вест. Белгиската народна банка тврди дека приемот на бегалците може да биде одличен за земјата.