„Почнавме да правиме добар извештај, но ги изгубивме допирните точки од двете страни“, вака денеска пред новинарите досегашниот претседател на Експертската комисија за 24 декември, професорот Борче Давитковски ја образложи својата оставка од комисијата.
И покрај тоа што имал намера лично на претседателот Горѓе Иванов да му ги образложи сите детали за својата одлука, сепак од Претседателскиот кабинет му било соопштено дека Иванов не е присутен и дека ќе го прими деновиве.
Давитковски ја депонираше денеска оставката кај Иванов. Како што рече тој не ја исклучува можноста доколку членовите на комисијата од СДСМ и од ВМРО – ДПМНЕ се договорат за, како што рече, „правните квалификации и препораките“, тој би го ставил својот потпис како претседател.
Како што објави НОВА, постои голема разочараност кај Давитковски, но и кај меѓународниот фактор за дебаклот на Комисијата за што постојат напори од страна и на американската и европската страна да се консолидираат двете спротивставени партии СДСМ и ВМРО-ДПМНЕ и да дојде до соодветен епилог, со кој би се согласиле партиите и би се затворило досието Собраниски инциденти на 24 декември.
Како што е познато, во април Европската комисија најави дека препорачува старт на преговори за Македонија, но таа препорака е условена со резултати од мартовскиот договор помеѓу ВМРО ДПМНЕ и СДСМ, препораката зависи директно од тоа дали ќе се формира анкетната комисија за расчистување на инцидентите од 24 Декември, дали ќе се продолжи дијалогот со новинарите и склучувањето на меморандумот за соработка помеѓу партиите.