Координаторот на Пратеничката група на ВМРО-ДПМНЕ, Илија Димовски ја обвини опозициската СДСМ дека намерно ја кочи работата на Комисијата за образование, поднесувајќи 980 амандмани за да се одвива бесконечна расправа за изградба на државниот Универзитет „Дамјан Груев“.
Димовски исто така ја обвини СДСМ дека на вчерашната седница на Комисијата се однесувала агресивно, дрско и недолично кон претседателката Олга Најденовска, нешто што според Димовски, било типично за најголемата партија во опозиција.
Сепак, како што потенцираше, целта била да не се донесе законот за основање на нов државен Универзитет за национална одбрана, безбедност и мир „Дамјан Груев“.
– СДСМ сака да го повтори сценариото за предизвикување на нови инциденти и нови кризи во Собранието на Република Македонија. Немаат аргументи, немаат програма, немаат идеи, но затоа навредуваат, затоа се закануваат, затоа поднесуваат илјадници глупави амандмани. Сакаат да креираат криза во Собранието, за да ја продолжат кризата која ја создадоа надвор од него, СДСМ знаат да работат само кога создаваат проблеми, деструкции и криза, изјави Димовски.
Тој дополни дека од поднесените 980 амандмани на СДСМ, ниеден немал суштинско значење туку во нив членовите на СДСМ „вежбаат граматика“.
Веднаш по прес-конференцијата на Димовски, прес-конференција одржа и координаторот на Пратеничката група на СДСМ, Горан Сугарески кој беше присутен во конференциската сала за време на изјавата на координаторот на најголемата партија на власт.
Сугарески рече дека откако ја проследил прес-конференцијата на Димовски, која траеше нешто над половина час, во неа забележал дека ставовите кои ВМРО-ДПМНЕ ги изнесува, потсетуваат на настаните непосредно пред 24.декември 2012 кога се случи т.н „Црн понеделник“, кога опозицијата и новинарите беа насилно отстранети од Собранието.
Тој рече дека тие не можат да расправаат по законот за изградба на државен Универзитет „Дамјан Груев“, бидејќи го немаат елаборатот добиено од Министерството, а во однос на амандманите, вели никој нема право да ограничува колку амандмани треба да се поднесат, а најмалку да ги оценува дали се добри или не, без расправа.
– Самата претседателка на Комисијата, Најденовска рече дека таа според Деловникот нема право да прекине расправа. Тоа што го прави претседателката е класично неделовничко работење и СДСМ не предизвикува криза ниту надвор ниту внатре во Собранието, изјави Сугарески.
Координаторот на СДСМ рече дека според нив, ниту финансиски ниту материјално не е прифатлив законот за универзитетот, бидејќи во него, смета дека ВМРО-ДПМНЕ ќе се оддолжува „одомувајќи“ свои членови.
Во амандманите, Димовски потенцираше дека СДСМ предлага да се избрише името Дамјан Груев, а на негово место предлагаат имиња како Страхил Гигов, Вера Ацева, Крсте Црвенковски, Видое Смилевски-Бато, кои никако не можеле да се споредат со Груев.