Потписите на договорот од Пржино не се доволна гаранција за задржување на препораката за членство. За тоа е потреба целосна примена на овој договор, порачаа комесарот Јоханес Хан и словачкиот министер за надворешни работи Мирослав Лајчак кој претседаваше со 12от Совет за стабилизација и асоцијација кој вечерва се одржа во Брисел.
Министерот Никола Попоски и министерот за евроинтеграција Фатмир Бесими ветиле дека европската порака во Скопје и во Владата е разбрана, изјави Лајчак.
– Договорот не е се уште гаранција за добар извештај но важно е што во последен момент земјата ја задржа европската врата отворена, рече Хан на прес конференцијата.
– Ова е можност и повик за земјата со добра волја да го примени договореното, рече Лајчак.
А комесарот Јоханес Хан изрази надеж дека оваа година нема да има одмор за македонските институции кои треба брзо да ја завршат подготовката за реализација на договорот од Пржино.
– Среќен што најдовме договор минатата недела. Треба да се каже дека сега нема време за губење и нема одмор барем не за институциите. Се разбира секој има право на одмор но нема одмор за институциите за да се подготви примената на договореното. На 15 септември треба да има специјален обвинител како што фиксиравме, рече Хан и додаде дека има работа за да се почитуваат сите договорени рокови од договорот од Пржино за да се подготват изборите на 24 април 2016 година.
Според Хан, Европската комисија има намера да помогне но тој подвлече дека одговорноста за примената се наоѓа кај Владата и политичките партии.
На Советот за стабилизација и асоцијација најмногу се разговарало за потребата од брза примена на договорот. Хан очекува дека ќе се спроведат препораките од извештајот на Прибе и сето тоа ќе се разгледува на 18 септември во Скопје во текот на Високиот политички дијалог помеѓу Комисијата и Македонија.
Хан инсистираше на тоа дека Комисијата, која го олесни договорот, не може да ја олеснува и целата негова примена. Според комесарот, пораките од ЕУ се сега јасни а тие препораки покриваат повеќе области за кои се одговорни повеќе државни агенции како УБК, Македонската радио-телевизија, ДИК итн.
– Подготовката на изборите ги покрива сите овие области. Знам дека има внатрешни разговори во партиите. Се не беше договорено на 2 јуни но се надевам дека партиите ќе можат да најдат договор за овие области. Го олеснивме договорот но нема се да олеснуваме, рече Хан.
Според Лајчак, ЕУ би сакала да ја види Македонија во процесот на преговори за членство но дали тоа ќе биде можно зависи од Македонија.
– Ќе ни биде драго да бидеме дел од успешно проширување на ЕУ но тоа зависи од змејите во регионот, рече Лајчак и испрати охрабрување до Македонија и Грција за да најдат решение за спорот со името.
Во ЕУ постои оптимизам дека сега, по договорот за решавање на политичката криза и доколку тој биде ефикасно спроведен, има реални шанси за решавање на спорот со името што би довело до старт на преговори за членство во ЕУ и членство во НАТО.