Je suis Bruxellois, Ik ben Brusseleir! Со овие зборови американскиот државен секретар Џон Кери во текот на својата куса посета на Брисел и даде поддршка на Белгија која минува низ тешки моменти по терористичките напади. Кери и ја понуди американската соработка не само на Белгија туку и на целата Европска унија.
Факт е дека на Белгија ќе и треба помош и од Америка и од цела Европа. Секој ден носи нов развој во истрагата. Сега е веќе сосема сигурно дека бриселскиот терористички напад е во тесна врска со париските напади. Нови елементи доаѓаат и од другите европски земји.
Германската полиција кај едно лице откри смс порака од Калид Ел Бакрави, бомбашот самоубиец од бриселското метро во која пишува “Крај” на француски, испратена три минути пред експлозијата во метрото Малбек. Си-Ен-Ен објави дека бомбашот од аеродромот се наоѓа на анти терористичката листа на ЦИА уште пред нападите во Париз. А од Грција стаса вест дека во Атина, во стан изнајмен од еден од учесниците во париските напади, се најдени цртежи и карта на бриселскиот аеродром.
Логичен заклучок е дека истрагата мора да биде меѓународна и пред се европска ако сака да биде ефикасна и мора да се води по поговорката: заедно сме посилни. Но, дали земјите членки на Унијата се спремни за искрена соработка и чесна размена на разузнавачки податоци?
Неделава во Брисел се одржа средба на министрите за внатрешни работи на Европската унија која пред се беше симболична, да покаже обединета Европа. Тој симбол политички е значаен.
Но кога се работи за конкретни одлуки за жал Европа е далеку од целта. Да чуеме кои се желбите на Унијата од подпретсетаделот на Европската комисија Франс Тимерманс:
– Важно е министрите да заклучат дека треба да се разменуваат информации на највисоко ниво, повеќе отколку досега и треба да се забрзаат предлозите кои се на маса за да се најдат пари и да се оневзоможат терористите да користат кредитни или припејд карти, да се следи каде е оружјето… Да има добра соработка и да го оневозможиме тие луѓе да дојдат до инструменти со кои носат терор во Европа.
Од време на навреме има мал напредок во иницијативите за размена на отисоци на пример. Но тој прогрес е срамежлив и секоја земја сака да го сочува својот суверенитет во деликатната област на разузнавањето. Или со обични зборови: довербата е практично на нула.
А терористите со нападот во Брисел на сто метри од европските институции јасно ставија на знаење дека целта не се само Белгија или Франција, целта е Европа и нејзината демократија и толеранција. Тие немаат политички барања. Нивната цел е Европа да стане заложник на теророр и стравот.
По откриената смс порака во Германија, станот во Атина, присуството на терористи од франко-бриселската мрежа во Австрија, Унгарија, сите земји членки треба сериозно да стават прст на чело, да ги надминат суверенистичките егоизми и да влезат во длабока соработка.
Ако сакаат да ја спасат Европа а со неа и Шенген зоната, полициско-судската соработка и заедничка анализа на ризиците им се единствената опција. За да не гледаме повторно мачни сцени и минути на молчење.