Некаде пред четири часот изутрина заврши распитот на осомничените во првиот случај кој го отвори Специјалното јавно обвинителство „Титаник“. Единствените лица кои новинарските екипи ги забележаа беа поранешниот министер за транспорт и врски Миле Јанакиевски и градоначалникот на општината Пустец од Албанија Едмонд Темелко. Јанакиевски беше регистриран како влегува во судот, а екипите, иако ограничено и од надвор, имаа можност да го видат поранешниот министер како седи во ходникот на судот и го чека својот ред за распит пред судијата на претходна постапка.
Според официјалните информации, во судот биле донесени на распит четворица од осомничените во случајот „Титаник“, но јавноста единствено можеше да ги види Темелко и Јанакиески. Таму беа и повеќе адвокати, меѓу кои и Никола Додовски кој што го застапуваше премиерот Никола Груевски на суд во процесот со Зоран Заев за клевета.
Поранешната министерка за внатрешни работи не беше видена во судот, а извори на НОВА во судот тврдат дека таа не се појавила.
Судскиот распит за Јанакиески и Темелко следува откако специјалната јавна обвинителка Катица Јанева и нејзиниот тим вчера побараа притвор за осум лица и итно приведување на еден од нив поради изборна криминализација во рамките на првата акција на Специјалното обвинителство, наречена „Титаник“.
За осумтемината е побаран притвор поради изборна измами и нивно спречување во понатамошно делување.
Иако некои од медиумите објавија дека и екс-министерката Гордана Јанкулоска е во Кривичниот суд, не беше забележано нејзино присуство.