Најдобриот македонски ракометар, актуелен селектор и капитен, Кирил Лазаров, вечерва во „Александар Палас“ во Скопје ја промовираше својата автобиографија „Секогаш на победа“.
Книгата се однесува на неговиот животен пат – од Свети Николе до Нант. Преку Пелистер, Загреб, Веспрем, Сиудад Реал, Атлетико, Барселона и Нант каде што настапува денес Лазаров се изгради како еден од најдобрите бекови во светот со повеќе од 1.000 голови во Лигата на шампионите. Во кариерата Лазаров има и европска круна, рекорд според број на голови на Мундијалот, петто место на ЕП со Македонија…
– Сите Македонци знаат многу работи за мене, но во книгата ќе може да прочитате многу работи кои не сте ги знаеле. Имам трема затоа што сум прв македонски спортист кој се реши да напише една автобиографија, изјави вечерва Лазаров, пренесува Sportski.mk.
Освен големиот број соиграчи на Лазаров, сегашни и поранешни, на промоцијата присуствуваше и првиот човек на Ракометната федерација на Македонија, Живко Мукаетов.
Тој рече дека Кире е вистински професионалец од кој младите треба многу да учат и дека му е мило што во моментите на негов врв на кариерата тие соработувале заедно.
– Имав среќа во овие осум години да работиме заедно. Факт е дека ни требаше малку да се воиграме, но почнавме тимски да функционираме. Тој е вистински професионалец и човек од кој младите ракометни генерации треба да учат буквално секоја секунда. Мило ми е што во моментите на врвот на кариерата и максималната зрелост, имавме можност да соработуваме, изјави Мукаетов.