Европа не се предава така лесно. Се согласува со тоа дека Америка треба да биде прва како што сака Доналд Трамп. Но почна и борбата за второто место во светот. Европските земји почнаа да ги претставуваат нивните убави и “убави” страни кои можат да му се допаднат на Трамп.
Но, да не ви раскажуваме. Погледнете сами.
Прва почна Холандија. Трендот почна со клипот на сатиричното шоу “Недела со Лубах” кое доби над 16 милиони кликови во само неколку дена на интернет.
Веројатно сте виделе како Холандија се шегува со Трамп имитирајќи го неговиот глас и неговите омилени изрази. Еве го уште еднаш.
Потоа Швајцарија реши дека треба да го крене својот глас. Преку ноќното шоу на комичарот Девил: “И ние знаеме лошо да ги третираме жените. Тоа ни се допаѓа. Не им дозволивме да гласаат до 1971 година. А во некои места ни до 1990 година”, се шегуваат Швајцарците со односот на Трамп кон жените.
Следи Германија со ноќното сатирично шоу “Нео кралски магазин” во кое се шегува со нивното нацистичко минато и берлинскиот ѕид.
Не заостанаа ни Данците и направија видео во шоуто “Натхолдет” во кое, помеѓу другото, се шегуваат со климатската скепса на Трамп.
Португалија има исто така свое ноќно сатирично шоу “5 Para A Meia-Noite” во кое му се претстави на Трамп:
“Нашиот татко основач и прв крал кој се бореше против неговата мајка – курва – и ги исфрли Арапите кога тие сметаа дека ова е нивна земја. Да. Онака скроз ги исфрли. Арапите. Знаеме дека сега мислите: нашиот прв крал би бил одличен секретар за одбрана. Но не е жив повеќе. Тажно”.
Следат Белгијанците од Фландрија со шоуто со име “Идеален свет” во кое потсетуваат на зборовите на Трамп од неговата кампања кога рече дека Брисел е “дупка за стаорци”:
“Навистина, Брисел е голема дупка за стаорци. Но остатокот на Белгија е фантастичен. Навистина фантастичен. Верувајте. Освен франкофонскиот дел на земјата се разбира бидејќи ние нив ги мразиме. Тие се како белгиски Мексиканци”.
Шестата земја е Литванија во шоуто «Laikykites Ten» во кое се вели дека една така мала земја не заслужува второ место, може и трето но сепак има што да му понуди на Трамп.
Направен е и сајт со сите европски земји помеѓу кои е и Македонија. Сега останува и другите 38 европски земји да направат свое видео со кое ќе му ги претстават сите нивни страни кои би можеле да му се допаднат на новиот американски претседател.