Подобрување на епидемиолошката слика на ковид-19 кај целокупното население, но зголемување на инфекциите со коронавирус кај лицата од 6 до 14 години. Препораки за вакцинирање на невакцинираните граѓани и примање на бустер или трета доза на веќе вакцинираните граѓани. Со скринингот се сака да се опфатат случајни минувачи, а не оние лица кои имаат потреба. Ова се главните пораки од прес-конференцијата на Комисија за заразни болести на која говореа претседателот Александар Петличковски и портпаролот Злате Мехмедовиќ.
Според индикаторите, за минатата недела бележиме зголемување на бројот на случаи на коронавирус кај лицата на возраст од 6 до 14 години. Простор за загриженост нема, но, сепак, треба да се придржуваме до пропишаните протоколи за настава со физичко присуство, со апел и до родителите и до учениците да го прифатат теститарњето за што се отворени и неколку дополнителни пунктови. На пример, во Скопје од денеска се пунктовите во Ѓорче Петров, Идадија и Бит пазар, за закажување на термини преку матичен лекар. Дополнително, планираме да отвориме и пунктови низ држава, тоа се оние на Центрите за јавно здравје, со цел да го скратиме периодот за закажување на термини, истакна доктор Петличковски во обраќањето пред новинарите по денешниот редовен состанок на Комисијата за заразни болести.
На состанокот на Комисијата за заразни болеста била дискутирана и смртноста од ковид-19 во државата и сите анализи, дополни доктор Петличковски, јасно упатуваат на фактот дека најголем дел од починатите се невакцинирани или нецелосно вакцинирани или вакцинирани со две дози пред повеќе од шест месеци.
Оттука произлегува силен апел до сите граѓани да се вакцинираат и да примат трета доза, бидејќи вакцинирани со трета доза, без коморбидитети, практично нема меѓу починатите, а бројот на хоспитализации се многу малку. Третата доза исклучително ефикасно штити од хоспитализација и смрт и тоа се најпроверливите и најважните научни факти кои мора да се јасни на секој од нас. Деновиве гледаме разноразни нестручни дебати, ќе ги наречам шарлатански, кои ги доведуваат во прашање овие податоци. Но, овие податоци се најрповерливи и апсолутно најсилни, нагласи Петличковски.
Целта со скринингот, дополни тој, е да се опфатат случајни минувачи, а не оние кои доаѓаат наменски да се тестираат.
„Сакаме да тестираме случајни минувачи, а не луѓе кои имаат потреба од тестирање за да имаме подобар увид во состојбата со имунитетот на коронавирус на терен. Затоа и не ги откриваме локациите на кои се одвива процесот. Во текот на вчерашниот ден собравме околу 200 примероци, почнуваат да се анализираат и за брзо време ќе имаме податоци. Планот е за Скопје да собереме околу 1.000 испитаници, веројатно на пет различни локации. Очекувам во текот на наредната недела да имаме првични податоци за серопреваленцата во Скопје. Паралелно со тестирањето во Скопје, тестираме и низ државата, со тоа што насекаде нѝ помагаат трансфузиолошките заводи“, појасни претседателот на Комисијата за заштита од заразни болести.
С.Д.