Последниот судир вечерва се случи вечерва пред 10 часот, откако првично полицијата, но и толпата почнаа да се повлекуваат, а се најави патролирање низ Ѓорче Петров. Тогаш поголема толпа се собра пред казиното Сенатор кое беше буквално демолирано.
Толпата влезе во казиното, го вадеше инвентарот и го фрлаше во запалените контејнери на улицата. Полицијата пристигна по околу 30 минути и и овозможи на пожарната да го гасне пожарот. Претходно, пожарната беше спречена од толпата да дојде на локацијата. По кусиот судир помеѓу полицијаците и насобраните, тензијата спласна.
Иако присутни, новинарските екипи со огромни тешкотии ја работеа својата работа, а постојано беа спречувани да снимаат и фотографираат, како од полицијата така и од самите граѓани.
Во моментов во Ѓорче Петров толпата е разбиена, а полиција во огромен број останува да го одржува редот.
Во вечерашните протести во скопската општина Ѓорче Петров организирани по убиството на 18-годишниот Ангел Петковски, приведени се 27 лица, од кои 16 во полициската станица во Кисела Вода, а 11 во полициската станица во Карпош. По документирањето на случаите против нив ќе бидат поднесени соодветни пријави.
Според полицијата, протестите поминале без посериозни инциденти и поголеми нарушувања на јавниот ред и мир.
За време на протестите во неколку наврати биле фрлани камења и метални предмети кон полицијата, поради што се повредени неколку полицајци и оштетени неколку полициски возила, но билансот ќе се знае откако полициските службеници ќе се вратат од терен.