Осумгодишниот Хајрудин Камењаш, кој боледува од леукемија и на кого му остануваат едвај месец дена живот според лекарите, отпатува од родната Босна и Херцеговина во Париз за да го запознае својот идол, фудбалерот Златан Ибрахимовиќ, што била и неговата последна желба пред да почине. Иако родителите на малиот Хајрудин биле договорени за средбата со фудбалерот на 1 ноември, кога семејството стигнало на стадионот во Париз, им било кажано дека ѕвездата на Парис Сен Жермен (ПСЖ) е повреден и нема да може да си го исполни ветувањето.
Парискиот клуб им закажал нов состанок утредента наутро, семејството чекало над 5 часа за накрај да слушне дека повторно Ибрахимовиќ има “професионални обврски“ и нема да се појави. На крајот на денот, семејството дознало дека Ибрахимовиќ всушност го поминал попладнето на тениската утакмица на Новак Џоковиќ, раскажува Теа Рекиќ, која е дел од асоцијацијата што го организирала патувањето на момчето во Франција.
Ова не е прв пат фудбалерот да го “откачи“ малиот Хајрудин.
На почетокот на минатиот месец беше прв пат објавена потресната приказна на болното детенце чија последна желба во животот му била да го запознае својот идол, Златан. Кога Златан слушнал за Хајрудин бил толку трогнат што сними видео за него, во кое му вели дека не може да отпатува за Босна, но дека му испраќа од него потпишан дрес.
Бидејќи не можел да дојде, семејството се одлучило да отпатува во Франција со познатиот крај…
Амела, мајката на Хајрудин, вели дека се чувствува понижено, а на својот син одбива да му ја каже вистината за да не го повреди.
Пред да замине назад дома, Хајрудин му оставил на Златан цртеж и го замолил шоферот да му го предаде.
Теа Рекиќ, организаторката на патувањето изрази големо разочарување, но повика да не му се суди на фудбалерот пред да се дознае неговата верзија на настанатите. Одредени француски медиуми објавија дека Ибрахимовиќ воопшто не бил информиран од менаџерите кои ја договарале средбата за доаѓањето на малиот Хајрудин.